Fase 3. Presentá bo keho na Komishon di Disputa di Seguro Kòrsou
E komishon ta konsistí di tres miembro, unu nombrá pa e kompanianan di seguro, unu nombra pa Fundashon pa Konsumidó i un presidente independiente i imparsial. E Komishon di Disputa ta analisá e keho i bini ku un desishon. Un di e benefishinan di e Komishon di Disputa ta ku e ta duna un veredikto pafó di Korte den disputanan entre un konsumidó i su kompania di seguro. Un prosedura ku lo ta ménos kostoso i ku lo tuma ménos tempu.
Stap 1. Entrega di keho
• Yena i entregá e formulario di keho ku ta
disponibel na sekretariado di GVC, esaki ta pasa via
di sekretariado di Fundashon pa Konsumidó.
• Añadi otro dokumentonan relevante na bo fail ya
eksistente na Fundashon pa Konsumidó.
• Paga e suma di fl. 150,00
• Pa e kaso keda tratá mester kumpli ku tur e
rekisitonan
• Na momentu ku bo entregá bo keho segun e
prosedura stipulá, bo ta risibí un komprobante.
Stap 2. Fase di investigashon
Sekretariado ta manda e dokumentonan pa e komishon. E komishon lo kuminsá un proseso di investigashon pa averiguá si e kaso ta atmisibel pa e komishon i ku nan por trata e kaso.
Stap 3. Presentashon di kaso na kompania di seguro
Na momentu ku resultá ku e komishon ta outorisá pa trata e kaso, sekretariado ta manda tur loke a keda entregá pa e kompania di seguro ku mester reakshoná denter di 30 dia por eskrito ku motivashon i splikashon di e dokumentonan ku nan a risibí. Si ta nesesario e komishon por alargá e periodo.
Den kaso ku e komishon no ta outorisá pa atendé e kaso, e komishon ta indiká esaki na sekretariado ku lo imformá e kliente. Su úniko opshon e ora ei ta pa bai ku su kaso korte.Si e kompania di seguro kontestá den e tempu stipulá sekretariado lo manda un nota por eskrito di e reakshon i tur e dokumentonan risibí pa e konsumidó.
Stap 4. Posibilidat di interogashon
E komishon por hasi petishon na ámbos partido pa atkerí algun informashon ku ta nesesario pa tuma un desishon den e kaso.
Stap 5. Eventual petishon pa konseho
Durante di e proseso e konsumidó por risibí asistensia òf defensa di un terser partido.
Stap 6. Veredikto
Pa konkluí e proseso di e keho e komishon ta presentá un veredikto ku ta mara e kompania di seguro. Esaki ta nifiká ku e kompania di seguro mester mantené/sigui e veredikto risibí. E veredikto ta duna un splikashon detayá kon a yega na e veredikto. Si e kompania di seguro no reakshoná den e 30 dianan stipulá pa e Komishon di Disputa por duna veredikto inmediatamente. Un veredikto mester keda duná denter di 4 luna ku bo a entrega bo keho.
Stap 7. Eventual kontinuashon
Veredikto di e komishon no ta mara e konsumidó. Na momentu ku e konsumidó no ta di akuerdo ku e veredikto e por bai korte i entamá un kaso kontra e kompania di seguro. Hues lo husga e kaso kompletamente di nobo.
Komishon di Disputa di Seguro Kòrsou (Geschillencommissie Verzekeringen Curaçao) ta fundá pa asosiashon di kompanianan di seguronan di Kòrsou i Boneiru, Curaçao and Bonaire Insurance Association (CBIA) i Fundashon pa Konsumidó. Komishon di Disputa di Seguro Kòrsou ta sòru pa tratamentu independiente di kasonan entre konsumidó i kompania di seguro.