Konsumidó Alertá Volumen 31, Febrüari 2017 - Page 6

Konsumidónan pabien. 15 di mart ultimo tabata dia mundial di derechinan di konsumidó. Den kuadro di esaki Fundashon pa Konsumidó huntu ku diferente organisashonnan internashonal manera ‘Consumers International’, ta selebrá i pone énfasis riba e importansia di e dia aki. Tur aña ‘Consumers International’ ta skohe un tópiko, di kual e diferente organisashonnan rònt mundu tin ku elaborá riba dje, adaptando esaki na e situashon real di kada pais. E tópiko di e aña aki ta: un mundu digital konfiabel pa nos konsumidónan.

Kiko ta un mundu digital konfiabel?

E mundu digital ideal i konfiabel ta esun kaminda abo ta sinti bo protehá paso bo informashonnan personal ku bo a eksponé, konsiente òf inkonsientemente, ta ‘safe’. Nos tur por tuma nota kon rápido e mundu digital ta avansando. Esaki ta pone ku kompanianan online mas i mas ta pidi pa nos konfia den nan ku nos informashonnan personal. Echo ta, ku hopi di nos praktikamente no por biba mas sin e mundu digital. Pero apesar di esaki, tòg tin algun punto ku nos mester ta konsiente di dje. Kon konfiabel e wèpsait kaminda bo ta bestèl algu ta? Kon protehá bo ta, na momentu ku bo ta konfia e mundu digital ku informashonnan di bo tarheta di krédito? Bo tabata sa ku kompanianan fásilmente por hasi uzo di e informashonnan ku, konsiente òf inkonsientemente, bo ta eksponé online? Komo Konsumidó nos tur lo ta deseá pa nos informashonnan personal keda personal. P’esei nos mester ta konsiente di kiko i na ken nos ta eksponé nos informashonnan personal na dje.

Ta importante pa nos realisá ku ta nos komo Konsumidó ta aktornan prinsipal pa desaroyo di un bon ekonomia digital. Si un Konsumidó no tin e konfiansa sufisiente den produktonan òf servisionan ku un mundu digital ta ofresé, fásilmente e merkado aki por stanka. Pa esaki no sosodé, gobièrnu i kompanianan mester uni i brinda nos konsumidónan un mundu digital konfiabel.

Resultado di un investigashon ku a keda hasí, ta mustra ku 47% di hende rònt mundu ta preokupá paso nan no sa kiko kompanianan ta hasi ku nan informashonnan personal.

Proyekto di informashon i konsientisashon

Mirando e porsentahe aki, Fundashon pa Konsumidó ta kere ku ta sumamente importante pa nos pueblo ta bon informá riba e desaroyonan aki. Komo tal, Fundashon pa Konsumidó ta lansa un kampaña informativo ku lo dura te ku luna di aprel. Kuminsando for di awe, lo bo por mira diferente videonan riba media sosial i televishon, foyetonan informativo, komunikadonan rondó di e tema aki i tambe un revista digital spesial dediká na e tópiko aki. Riba término mas largu, Fundashon pa Konsumidó lo aserká kompanianan lokal pa wak kon nan ta protehá datonan di nos konsumidónan i tambe manda un karta pa nos gobièrnu pa instalá e asina yamá ‘College Bescherming Persoongegevens’.

Si bo ke mas informashon over dje tema aki òf djis bo ke sa mas di nos Fundashon, manda nos un mail na info@fundashonpakonsumido.org. Tambe bo por aboná gratis riba nos revista digital “Konsumidó Alertá”.

BAN PA UN MUNDU DIGITAL

KONFIABEL!

Fundashon pa Konsumidó tei pa informá, konsientisá i eduká abo komo Konsumidó.