Konsumidó Alertá Volumen 31, Febrüari 2017 - Page 4

DEN CHIKÍ

Kon largu bo ta kere ku bo ta trankil hasiendo uso di Internèt riba bo telefon inteligente, si’n tin di preokupábo ku bo informashonnan personal ta wòrdu malusá? Segun Europol, servisio di polis Europeo, e tempu ei a pasa kaba. “Malwares” pa telefonnan inteligente ta birando un problema grandi, aunke kòmpiuternan ku ta usa e sistema di operashon Windows ta kore mas rísiko ainda di ser infektá ku vírùs. Europol ta antisipá ku kasonan di infekshon lo sigui oumentá i ku e vírusnan pa telefonnan mobil lo bira mas fuerte i mas “sabi” tambe.

Den kuadro di esaki, e sentro di krímen sibernétiko di Europol a start na final di 2016 un kampaña pa konsientisá konsumidónan pa protehá nan smartphones kontra malwares. Esaki pasobra a nota ku krímennan sibernétiko a oumentá drástikamente speshalmente den paisnan kaminda e infrastruktura di Internèt ta bon desaroyá i ku e sistema di pagamentu onlain i transferensha di datonan personal ta algu normal.

Aki algun tep kon pa protehá bo mes mas mihó.

Instalá appnan -aplikashonnan- for di un fuente konosí i konfiabel. Promé ku deskarga un ”app”, investigá tantu e “app” mes komo su kreadó. Paga tinu ki tipo di informashon personal bo tin di duna pa bo por deskarga esaki.

No habri òf klek lenknan òf “atachments” ku bo no a pidi p’e.

Tene kuidou ku mensahenan di teksto ku ta bisabo habri sierto lenknan pa bo por sigui. Eliminá nan manera bo risibí nan.

Sera página di Internet ora kaba di realisá un pago.

Nunka warda(safe) bo nòmber i contraseña (password). Unabes e transakshon ta kompletá, Sali for di e página en kuestion i sera e esaki. No hasi transakshonnan bankario òf hasi un kompra onlain via wifi públiko. Usa un konekshon priva i sera. Si por, deskarga e app ofishal di bo banko riba bo telefon.

Tene bo sistema di operashon up to date. Deskarga e software nesesario ora indiká esaki.

Paga bo wifi, bo ubikashon i “bluetooth” si no bo ta usando esaki.

Kriminalnan por yega na bo informashon personal si bo konekshon no ta safe i sigur. No laga aplikashonnan sa bo ubikashon (location) si no tin mester. Desaktivá bo bluetooth por kompletu i no lag’e riba “invisible mood”.

Evitá di duna informashon personal.

Nunka manda bo informashon personal via mensahe di teksto òf email ku ta bisa ku ta bini di bo banko òf un negoshi konosí p’abo.

Regularmente kontrolá bo estado di transferenshanan mobil pa rekargonan dudoso.

Instalá un aplikashon di siguridat móbil.

Si ta posibel, utilisá un sistema di siguridat móbil ku ta detektá i prevení malware, spyware y otro aplikashonnan malisioso, kombiná ku “featurenan” di privasidat i protekshon anti-robo.

PROTEHA BO TELEFON MOBIL

KONTRA DI VIRUS