Konsumidó Alertá Volumen 31, Febrüari 2017 - Page 3

Editorial

PRÓLOGO

Marc Marshall

Direktor

Manera ya ta konosí tur aña di nobo organisashonnan di konsumidó rònt mundu ta selebrá riba dia 15 di mart e Dia Internashonal di Drechinan di Konsumidó. Kada aña Consumers International, ku ta e organisashon mundial di konsumidónan ta pone un tema pa keda tratá na kada pais ku tin un organisashon nashonal ku ta afiliá na Consumers International.

E aña aki e tópiko ta “Un Mundu Digital Konfiabel” (#UnMunduDigitalKonfiabel). Meta di e kampaña ta pa nos komo konsumidó ta konsiente di nos aktitut onlain: ken nos ta duna kua informashon personal, protehá bo mes i bo datonan ora bo subi internèt. Pero tambe un meta importante ta pa nos komo konsumidó tin e konfiansa i siguransa ku nos datonan i informashon ta keda tratá ku prudensia i koutela dor di kompanianan ku nos ta konfia ku nos informashon.

Un parti tambe di e siguransa ku e konsumidó mester tin den e mundu digital ta ku nos gobièrnu mester stipulá reglanan pa kon kompanianan ta trata nos datonan i tambe stipulá sanshonnan pa na momentu ku un kompania hasi mal uso di e informashon ku nos ta duna nan. Importante ta den esaki ku tantu e konsumidó, kompania i gobièrnu mester sòru tambe pa malechornan ku ta aktua tambe den nos mundu digital no yega na nos informashon di un konsumidó i hasi mal uso di esaki.

Nos a kuminsá ku un kampaña di informashon ku lo sigui den transkurso di 2017. Pa duna nos konsumidónan un bista di e aktividatnan ku Fundashon pa Konsumidó lo trata nos ta dediká e edishon aki di Konsumidó Alertá Digital kompletu na e tema aki. Mi ta invitá abo lesadó fiel di nos revista pa tuma nota di tur e artíkulonan interesante ku nos lo den e edishon speshal aki i keda pendiente di kontinuashon di e kampaña den transkurso di e próksimo lunanan.

Finalisando mi ta deseá nos konsumidónan un dushi temporada di seú i selebrá nos periodo kultural di kosecha konsiente i den bon esfera.

Un Mundu Digital Konfiabel