Konsumidó Alertá Volumen 31, Febrüari 2017 - Page 16

Aparatonan manera tablet òf smartphone awendia ta hopi uzá. Praktikamente nan ta e vershon mas nobo di loke ántes nos tabata konosé komo kòmpiuter. Meskos ku un kòmpiuter, e sistema interno (software) ta hopi krusial pa efisiensia i funshonamentu di un tablet òf smartphone. Pues, ta na e sistema interno, abo komo konsumidó ta sa kon vulnerabel bo telefòn ta.

Tur produkto di e marka Apple ta konsistí di e sistema iOS, kual ta un sistema konfiabel debí ku konstantemente esaki ta pasa un kontròl estrikto. Download un aplikashon riba bo telefòn mara Apple, ta solamente posibel via di e ‘appstore’ di iOS. Dikon? E kontesta riba e pregunta aki ta simpel. Pa e kompania Apple, protekshon di su usuarionan ta hopi importante. P’esei nan ta protehá tur nan usuarionan dor di kontrolá i sigurá ku kada aplikashon ta konfiabel i sin kualke tipo di vírus, promé ku esakinan ta optenibel den nan ‘appstore’.

E sistema Android kual ta di e konosido marka Google, kontrali di Apple, parse mas un kaha di konstrukshon. E ta wòrdu konsiderá un base kaminda fabrikante di telefòn tin e posibilidat pa amplia i moldia e sistema na nan manera. E posibilidat aki ta trese ku e fabrikante tin mayoria responsabilidat i ta pone ku kriminalnan riba e mundu sibernétiko, fásilmente por hasi daño na kualke usuario. Ademas, Google no ta kontrolá su aplikashonnan mesun estrikto ku Apple. Komo usuario di Android bo por download aplikashonnan for di diferente otro plataforma ku no ta solamente Google Playstore.

Konfiabel òf no?

Pa bo por evitá kualke tipo di vírus riba bo telefòn sabi , ta konsehabel pa bo bai den ‘settings’ i pone esaki na ‘standard setting’. E opshon aki ta pone ku bo telefòn por download aplikashonnan solamente via Google Playstore.

Pero ta alerta! Ku un bishita riba kualke wèpsait ku ta kontaminá, bo por yena bo telefòn Android ku vírus no deseá.

Un vírus skèner lo ta un opshon?

Awendia hopi kompanianan ku ta brinda anti vírus tin un anti vírus spesial pa Android. E pregunta ideal lo ta: kiko ta e balor di un vírus skèner pa e telefòn? Hopi bia e vírus skèner aki ta skèn solamente e aplikashonnan ku nan ta rekonosé komo vírus. Pero e vírus ku ta kontagiá bo telefòn via di un wèpsait no ta keda di skèn. E solushon perfekto lo ta pa download un ‘security update app’. Esaki lo keda update bo telefòn frekuentemente i evitá vírusnan for di aplikashonnan i tambe wèpsait. Pero tin un faktor ku lamentablemente ta sosodé hopi bia. Den mayoria kaso, e update ta bini muchu lat òf sa sosodé tambe ku bo telefòn no ta wòrdu di update mes. Google mes ta pone e update aki for di trempan disponibel, pero ta responsabilidat di e fabrikante di telefòn pa hasi esaki aksesibel pa su usuarionan.

Bo tin pensa di kumpra un Android nobo?

Tin diferente vershon di Android: vershon 4.2, 4.3, 4.4, 5.0, 5.1, 6.0 i resientemente Android a introdusí Android 7.0. Fundashon pa Konsumidó ta konsehá pa kumpra un e último modèl di telefòn òf e vershon promé ku esun nobo. Pero realidat ta ku 76% di usuarionan di Android tin vershon 5.0 òf mas abou. Mas nobo e modèl ta, mas siguransa bo tin ku bo telefòn ta mas safe. Pa un telefòn mas konfiabel kontra vírus i ku ta risibí update semper na tempu, ta konsehabel pa skohe pa un modèl di telefòn di e markanan Nexus, Pixel i Android One. Esakinan ta markanan di telefòn ku Google mes ta manehá. Pues, un telefòn konfiabel garantisá.

Bo desishon ta bai pa un otro marka di telefòn? Preferibel skohe un telefòn ku tin por lo mínimo Android 6.0. E Samsung Galaxy 7 ta unu ideal.

Konfiabel òf nò?