Konsumidó Alertá Volumen 31, Febrüari 2017 - Page 13

Último tempu nos a ripará, ku nos yunan di tera mas i mas ta hasiendo nan esfuerso, pa kuminsa ku nan propio negoshi. E desaroyo aki ta unu di aploudí, pa motibu ku esaki ta algu ku den tur sentido di palabra ta kumbiní pais Kòrsou. Si ta asina, ku den e proseso largu pa yega na un negoshi stabil, komersiantenan resien ta topa ku hopi kontratempu. Esaki a sosode tambe ku un makelar yu di tera resientemente, ku a kaba di kuminsa ku su negoshi di intermedia, ora di kompra i benta di kas i/of tereno.

A sosode ku despues ku e makelar a sera un akuerdo ku doño di un kas pa buska kumpradó pa e kas, e doño di kas a disolvé e akuerdo, djis prome ku e kas a wòrdu bendí. E doño di kas a hasi esaki probablemente, pa asina skapa di e obligashon di paga e makelar, ku ta esun ku a sòru pa un kumpradó pa e kas.

Lei ta bisa sinembargo, ku bou di sirkunstansianan e makelar ta keda ku derecho riba pago, despues ku doño di e kas disidí di disolvé e asina yamá, akuerdo di enkargo. Asina tambe a bin resultá, ku despues ku a disolvé e akuerdo ku e makelar, e kas a wòrdu bendí, hustamente ku e persona ku e makelar a buska pa kumpra e kas. E makelar a haña sa esaki i konsekuentemente a eksihí pago for di e doño di e kas. E doño di kas sinembargo, a nenga di paga e montante akordá, alegando ku e no a firma ningun akuerdo ku e makelar. Ela duna tambe di konosé, ku ela bende e kas sin ningun intervenshon di e makelar. Korte sinembargo a duna e makelar rason. Esaki pa motibu ku tabatin un email ku ta mustra, ku partidonan a sera un akuerdo di enkargo ku ta enserá pago di un porsentahe di e montante di benta, si e kas wòrdu bendí dor di intervenshon di e makelar.

Den e kaso a sali tambe na kla, ku e persona ku a kumpra e kas, indudablemente a keda presentá dor di e makelar. Esaki pa lei ta trese kune, ku e makelar sin mas tin derechi riba pago pa su trabounan. Tambe ta asina, ku si e kas no a keda bendí dor di intervenshon di e makelar, bou di sirkunstansianan e makelar tòg ta keda ku derechi riba pago, sea kompletu of parsial di e montante akordá. Esaki ta e kaso, ora ku pa falta di e bendedó di kas, e akuerdo keda disolvé.

Lei ta sali tambe for di e punto di bista, ku si no tin montante of porsentahe akordá entre partidonan, e makelar lo por tin derechi riba un pago hustu di salario. Esaki ta dependé di tur e trabounan ku a ser hasí, e motibu ku a disolvé e akuerdo i di e bentaha ku e doño di kas tabatin ku e benta. A base di esakinan, Korte por stipulá un montante riba kua e makelar tin derechi komo pago.

Por konkluí e ora ei, ku nos leinan ta protehá e makelar kontra di bendedónan di kas i/of tereno inhustu. Si ta asina, ku si e doño di kas nenga di paga e montante i/of porsentahe akordá, komo makelar mayoria bia bo mester akudí na Korte pa haña bo derechi. Ta di konsehá anto, pa komo makelar bo akordá un ke otro por eskrito i mas aleu protehá bo mes, dor di stipulá kondishonnan general ku ta konta pa ku e akuerdo.

Artíkulo kortesia di abogado Mr. Rainey Conquet