Konsumidó Alertá Volumen 3, yanüari 2014 - Page 3

Hasi mas ku mesun forsa

Direktor Fundashon pa Konsumidó

PRÓLOGO

Introdukshon di nos revista digital Konsumidó Alertá Digital na novèmber 2013 tabata e promé paso di Fundashon pa Konsumidó riba e rumbo nobo den kua nos ke duna kontenido na palabranan manera transparensha, kolaborashon i empoderashon. Den e lunanan ku ta sigui nos lo bai lansa algun proyekto ku lo demostrá e vishon i mishon nobo di nos fundashon.

Nos wèpsait www.fundashonpakonsumido.org lo keda remodelá pa bira ainda mas fásil pa buska i haña informashon i bira tambe mas interaktivo pa nos i nos konsumidónan por komuniká ku otro mas fásil, mas lihé i mas efektivo. Tambe nos lo introdusí nos sistema digital pa hasi nos komparashonnan di preis, pa asina por hasi mas komparashon di mas produkto i servisio riba un base ainda mas frekuente. E intenshon ta pa despues kada konsumidó por hasi uso di nos sistema via di su smartphone pa unu, yuda nos fundashon ku nos komparashonnan di preis i tambe tin akseso na preisnan mas aktual. Den un fase mas aleu kada konsumidó lo por usa e aplikashon pa traha su lista di kompra i saka al instante e preisnan mas kumbiniente kada biaha ku e ke kumpra algu.

Un otro proyekto revolushonario lo ta nos wèpsait habrí riba kua nos lo trata kehonan di konsumidónan i tambe kaminda kada konsumidó por kompartí ku nos tur kehonan ku e tin na momentu di kumpra un produkto of servisio. Tur esaki nos ke logra ku outomatisashon pa asina hasi mas ku e mesun forsa. Semper a base di transparensha i ku kolaborashon di nos konsumidónan pa asina nos empoderá otro pa ta konsumidónan mas konsiente.

E edishon aki di nos revista digital ta dediká na e tema di protekshon di nos kuminda. E liña kòrá ku ta kore den e edishon aki ta seguridat, konfiansa i protekshon ku nos mester tin komo konsumidónan pa kumpra, usa i kome solamente produktonan di kua nos tin sigur ku no ta malu pa nos salú. Alimentashon saludabel i seguridat di produkto- i servisionan di kalidat ta algu ku kada konsumidó tin derechi riba dje. Tambe den e edishon aki bo por lesa tokante Lei di etikèt i fecha di vensementu, lo tin tepnan pa bo hasi kompra mas rendabel i tambe nos ta trata e Komishon di Konseho di Merkansia ku lo mester keda instalá di nobo pa yuda drecha kalidat di produktonan ku nos ta kumpra.

Marc Marshall