Konsumidó Alertá Volumen 2, desèmber 2013 - Page 3

Resúmen di aña

Direktor Fundashon pa Konsumidó

PRÓLOGO

Ku e di dos edishon di nos revista digital nos ta sigui ku nos mishon pa informá konsumidónan riba nan derechi i debernan. Na fin di un aña ku hopi trabou nos ke hasi uzo di e okashon pa trese un resúmen kòrtiku di trabounan di Fundashon pa Konsumidó den e aña aki. Manera nos sa e áreanan di trabou di nos fundashon ta hopi i variá. For di atendé kehonan ku ta drenta di nos konsumidónan, kompará preisnan den negoshinan te hasi investigashonnan i informá nos komunidat pa medio di nos revista i publikashonnan. Hasiendo uzo di medionan soshal manera Facebook nos ta trata di ta aksesibel pa kada konsumidó.

Nos a atendé te ku novèmber 2013 un total di 120 kaso di kual 61 kaso (51%) a keda resolvé. 18 kaso ainda ta habri (15%), 24 kaso nos a sera sin solushon (20%) i 16 persona a akudí na nos pa konseho i nan mes a solushoná nan kaso. Un logro grandi ku Fundashon pa Konsumidó a hasi ta e firmamentu di un akuerdo pa yega na un Komishon di Disputa (Geschillencommissie) ku e kompanianan di seguro asosiá den Curaçao and Bonaire Insurance Association (CBIA).

E introdukshon di Konsumidó Alertá Digital ta marka komienso di un era nobo den kua nos lo bini ku strategianan nobo basá riba un vishon di transparensha, kolaborashon, kompartimentu i empoderashon di abo konsumidó.

2013

Marc Marshall

Den 2014 nos lo hasi un apelashon riba nos konsumidónan pa yuda nos komo boluntario, ku proyektonan ku nos tin. I sigur nos lo sigui ku nos Kurso di Presupuesto ku a yuda hopi di nos kaba pa biba un bida finansiero balansá.

Di parti di personal i direktiva di Fundashon pa Konsumidó mi ke deseá un i tur un felis Pasku i un próspero aña 2014. Disfrutá di e dianan di fiesta, yená ku pas, amor i alegria. Kòrdá aboná pa risibí e edishon digital di nos revista. Manda un e-mail pa info@fundashonpakonsumido.org, tuma kontakto via nos e link aki òf subi nos wèpsait www.fundashonpakonsumido.org. Aboná ku bo adrès di e-mail i risibí bo revista digital outomátikamente den bo mail.