Konsumidó Alertá Volumen 2, desèmber 2013 - Page 13

Kiko mester tene kuenta kuné

Nos lo trata di duna un splikashon di puntonan importante ku por bin dilanti na momentu di kumpra un outo. Tene e puntonan aki bon na konsiderashon promé ku bo firma un kontrakt di kompra.

Oferta di kompra: E dokumentu stándart ku un diler lo ke pa bo firma pa mara bo mes na kompra di loke ta para deskribí den e dokumento pa e preis fihá. E diler duna muestra di ta akseptashon di bo oferta dor di tambe pone su firma. Na momentu ku ámbos partido firma e kontrakt esaki ta válido i tur dos partido na mará na dje.

Nunka paga un depósito si bo no tin sigur di lo finalisá e transakshon. Bo por pèrdè bo depósito si bo no por kaba di kumpli ku e areglo.

Garantia: chek semper si garantia òf reparashonnan prometé ta pone riba papel promé bo firma. En partikular, chek si tin garantia di fábrika i si esaki ta aplikabel den bo kaso.

Hinka aden, saka nobo: hopi di nos ta hasi uso di e posibilidat pa hinka nos outo bieu aden pa sak un nobo seka un diler. Ta bon pa tuma nota bou di kua kondishon e kambio aki ta sosodé i komprondé esaki bon. Por pasa ku bo ta firma un kontrakt basá riba e estado di bo outo na e momentu ei i promé ku hasi e interkambio físiko di outo bo outo no ta den e mesun estado i aki e diler por pone den su kondishonnan pa balorá e outo di nobo.

Gastunan di fiansa: si bo ta regla bo fiansa pa kumpra bo outo via un diler, eksigí pa sa e kondishonnan di fiansa ku e banko ta stipulá. Tuma nota di esaki promé bo mara bo mes na un fiansa. Puntra pa sa kiko ta e komishon di e diler, kuantu bo gastunan di sera e fiansa ta, kiko bo ta paga na interes mensual i anual pero tambe puntra pa sa kondishonnan di anulashon di e kontrato pa si bo kambia di idea.

Hopi biaha bo outo ta keda propiedat di banko te na momentu ku bo kaba di paga e fiansa i si bo no por paga mas, banko por reposeé e vehíkulo. Pensa riba e opshon di tuma un fiansa personal. Lo bo paga mas na interes riba bo fiansa pero loke bo kumpra ku e fiansa ta di bo i mayoria biaha bo ta mas fleksibel pa paga e fiansa bek.

Transferensha di seguro: Si bo ta kambiando bo outo, avisá bo agensia di seguro na tempu pa e pasa e seguro riba bo outo nobo. Un bon asegurado lo a kubri seguro di ámbos outo riba e dia di traspaso pa abo komo kliente nunka por haña bo den niun sorto di problema. Tene esaki na mente na momentu di sera bo seguro.

Promé bo firma un kontrakt di garantia buska e siguiente informashon pa sa:

Kiko eksaktamente ta kubrí, kiko no ta kubrí, bou di e garantia.

Den kaso di un outo nobo, e garantia ta kuminsa na momentu di kompra of ora e garantia standart ta kaba.

Tin gastu adishonal si mester hasi reparashon?

E garantia ta kubri piesa pero tambe trabou?

E garantia ta duna outo di hür ora bo outo bai drecha?

Kua gastunan adishonal di bo e garantia ta kubri? Toumentu etc.

Tepnan final

Kuminsá ku un trayekto di kompra solamente si ya bo a tuma un desishon definitivo.

- Kumpra loke bo por paga.

- No sera un kontrakt tanten bo tin un otro ya firmá. Kanselá esun bieu promé

bo sera nobo.

- Lesa tur kondishonnan di kompra di tantu e diler komo di banko konserní

promé bo firma.

pa kumpra outo