Konsumidó Alertá Volumen 11, òktober 2014 - Page 18

BO SALÚ

Kòrsou te ainda konosé masha tiki hende ku ta duna sanger. Kaminda dunamentu di sanger ta algu masha simpel, tòg hopi hende ta hala tras. E miedu di angua òf pa kai flou ta laga nan deshasí di e idea di duna sanger. Klaro no ta tur hende ta pone e dunamentu di sanger un banda. Esnan ku por i ke duna sanger, ta skapa un otro hende su bida ku e bunita gesto aki.

Dikon tin nesesidat di donante di sanger?

Duna sanger ta di vital importansha. Sanger ta perkurá pa oksígeno i alimento nutritivo den tur parti di nos kurpa. Lástimamente ta pasa hopi ku tin hende ku mester di sanger. Pèrdida di sanger por presentá despues ku por ehèmpel bo haña un aksidente òf hasi un operashon. Tambe tin enfermedatnan kaminda hende por hañ’é ku falta na heru òf tin plaketa di sanger. Den e kasonan aki bo ta haña un transfushon di sanger i p’esei nos mester atrobe sanger di donante komun i koriente.

Kuantu persona ta duna sanger pa aña?

Na Kòrsou Fundashon Krus Kòrá Banko di Sanger Huize Batavia ta e organisashon ku ta sòru pa tur ora tin sufisiente sanger den stòk. Na e momentunan aki Banko di Sanger ta konta ku un total di 3200 donante ku ta duna sanger un par di bes pa aña riba un base boluntario. Ku e sanger ku nan ta duna, nos por bisa ku pa aña pashèntnan ta hasi uso di mas ku 10 mil produkto di sanger, entre otro sanger kòrá i plasma. E ekspektativa di Banko di Sanger ta pa oumentá i alkansá entre 4 pa 5% di nos poblashon. Na e momentu na aki tin sufisiente produkto di sanger pa tur hende ku tin nesesidat, pero tòg e porsentahe ku ta donante te ainda ta un tiki abou. Na mes momentu tambe ta asina ku tin donante ku no por sigui duna sanger, dor ku nan ta alkansá e máksimo edat pa por duna sanger. Pa e motibunan aki Banko di Sanger ta konstantemente aktivo pa buska mas donante i subi e kantidat di donante.

Duna Sanger