Konsumidó Alertá Volumen 11, òktober 2014 - Page 10

INTERMEDIO

Komishon di Hür e keda instituí un ku e meta prinsipal pa kombatí spekulashon ku preis di hür i subidanan di preis inhustu. Aktualmente e komishon tin dos tarea: 1. Konsehá riba preis di hür i 2. Stipulá si e kombenio di hür por wòrdu anulá. Komishon di Hür ta konsistí di tres miembro, di kual unu ta e presidente. E miembronan aki ta wòrdu nombrá dor di Gobernadó di Kòrsou.

Lei ta duna Komishon di Hür e outoridat pa stipulá preis máksimo pa hür un kas. Tantu e hürdó komo e doño di kas por hasi petishon pa laga hasi e kalkulashon aki. E mandato di komishon ta limitá si. Komishon di Hür por stipulá preis di hür pa kasnan ku un balor di merkado di te ku fl. 150.000,00. E montante aki por ser kambiá si via un ordenansa di lei. Na momento ku ta bai kalkulá e preis di hür máksimo pa aña, pa lei esaki no mag surpasá 12% di e balor di e merkado aktual di e bibienda. Ora ta stipulá preis máksimo, mester tene kuenta tambe e estado den kua e bibienda ta. Komishon di Hür tin e outoridat pa temporalmente stipulá un preis di hür mas abou, si konforme palabrashon, e doño di kas no a kumpli ku reparashon òf renobashon di bibienda den e tempu stipulá.

Banda di stipulashon di preis, Komishon di Hür ta aktua tambe ta atendé kasonan den kua un doño di kas ta pidi pa kanselá òf kibra un kontrato di hür. Si e doño ta kas kier kibra e kombenio di hür ku el a sera ku, e lo tin mester di pèrmit di e komishon pa hasi esaki.

Aki ta sigui 3 punto di atenshon pa tantu e doño komo e hürdó tene kuenta kuné ora kier kanselá òf kibra un kontrakt:

• E doño di kas mester tin pèrmit di e komishon si e

kier anulá òf kibra un kontrakt di hür. Si e hasi

esaki sin pèrmit, e kanselashon pa lei no ta válido.

• Si e kontrakt a terminá konforme e kombenio

entre partidonan, pero e hürdó ta deseá di alargá

e tèrmino, e doño di kas lo tin mester di pèrmit di

e komishon pa e por terminá e kombenio di hür.

• Dado kaso Komishon di Hür duna aprobashon pa

terminashon di un kontrakt, e por pone

kondishonnan pa e doño di kas si e kier sigui hür

e bibienda. Si e doño di kas no kumpli ku e

stipulashonnan aki, Komishon di Hür por revoká

su desishon di kanselashon i duna e hürdó

anterior e bibienda bek.