U Paiz son , doma
U Paiz son , doma
KOLAŽ LITERARNIH I LIKOVNIH RADOVA
Stari Grad na otoku Hvaru , oli po našu Paiz , misto je di su odresle moja nona i bižnona . Tuo je pri ’ bi ’ prastori Faros , a non je Paiz . Naši su stori vazeli ime grodu od taljonske riči paese , barž su pensali da smo jedino misto na svitu . Nison jo cili domoći , jer son se rodi u Zagreb i dugo tamo živi , ma mi je tote sad doma .
Daleka je starogrojska vala , baš kruto daleka i propju lipa . Sve okolo uz kroj je riva i viježene su puste brodice na obadvi bonde . Na dno vale ribari prodoju svoje noćne trude , vidi son ih skoro svaki don kad son tuda pasovo put skule . Iza peškarije , dovnih su don učinili Vuorbu , park ča dili desnu i livu bondu Paiza , a okolo konol sa par kamenih mostića . Ni Paiz obično misto . Nike su mu kuće po rivi propju ufino piturone u kolure , ma odovna , stotinama godišć . Svit koji ne poznaje Paiz , kad vidi letrate dila naše rive , penso da je to koji od taljonskih gradića .
Lip je bi pogled na misto iz skule u koju son hodi . Bila je na rivu , deboto škrok od mora . U somo jedon pogled kroz ponistru , vidi bi svitlo sunca na moru , brodice kako spidu viježene pod rivu , krove kućih i darvene zelene i sive škure . Nison moga falit di son . U Paiz son , doma .
Po putu iz skule doma , iša son po rivi ili po kolima . Da je riva oduvik bila duša grada , put kojin se dohodi i partije , govoridu imena kolih : Duolnja , Srinjo , Guornja . Duolnja je nojbliža rivi . Kuće kamene , sa velin mirima , darvenin debelin starinskin vrotima di se introje u dvore i konobe . Nojlipje su mi one ča imodu sulor . Sa kole ili sa dvora se kamenin skalima penje na sulore i introje u kuću , a u debeloj hladovini ispod su vrota od konobih . Prid vrota se stovjo tapnica . Pari mi se da je svima alavija ostala u pamet , jer je svakome u ditinjstvu niko viko : „ Star ’ noge na tapnicu !“. Perguli na sulorima su posebna štorija . Niki darždu lozu da se njih penje , nikima somo hlod činidu , a niki su karcati cvića ‘ misto gruožja ’. Naše fameje po skalima stavijedu cviće u vele i mole pitore , da svi ča pasodu tuda , kroz cilu kolu udišu liporu i život . Na svakemu kantunu se može vidit da je puno stariji , nego non se pari . Samostan i kula crikve Sv . Petra govori od vrimenima kad se branilo od Turaka . Na crikvi sv . Roka vidi se starost , pa se afanoš da je i starija , jer su tu pri pustih stotin ’ godišć bile terme . Dogodi se da propovjodu tleh u kolu pa ne kapiš ča su se svi skonsumali i zoč ne finijedu posol , a na pol metra ispod nošli mozaike store mijor godišć , barž i dvo mijora .
Uvik son put doma iša mimo Tvardoj , dvorac Petra Hektorovića . Ribnjak se ne može vidit ako vrota nisu otklopjena , ma priko mira iza njega se moglo pogledat lipi veliki vartaj . Isprid Tvardoja je slatina , ma jo još nikad nison u nju uspi upast . Barž bi se i jo tamo smoči , i to veće putih , da son se mlaji priseli u Paiz . Do doma son mora pasat kroz jurjevac , park fameje Bianchinni . U lito kamp , a zimi , ako si dobre sriće , može se i koze tamo vidit . Nojdroži dil Jurjevca mi je onin di i sad od subote i nedije igron košarku . Taman na pol puta od Jurjevca do Kuponja na Lanternu i u Duboku , kuća je di živin jo . Ni blizu centra mista , ma ni daleko , a sve puno arje , zelenila i mira . Do mora nizbardo je dvi minute . Kad duojdeš tamo , pari ti se da bi stinu moga hitit na Priko , drugu bondu Paiza , a kad bi se tamo uputi , vajalo bi hodit dobrih pol ure .
Lipota moga mista ni somo misto , nego i sve okolo njega : sitne vale u starogrojskoj vali na obadvi bonde , Glavica , Starač , Strone , Vorhi , poje po srid sridine otoka sve do Varbuoske i Jese . Sa svakega od tih mist ’ se vidi Paiz . Sa svakega je drukčiji , ma uvik lip . Nison se rodi ovamo , parvi dil ditinjstva nison ni živi ovamo , ma son ga ovih godišć vidi i upozno toliko da son sigur ’ kad rečen da ga poštijen i volin kako svuoj dom . Nison moga falit di son . U Paiz son , doma .
Marin Miljak Elektrotehnička škola Split , 2 . a
Misto mog ditinjstva , Mia Sulovskya Vitezica , 5 . razred , OŠ San Nicolo , Rijeka
KAPLJICE 2017 . 49