History, Wonder Tales, Fairy Tales, Myths and Legends De Familie Scheerlinck | Page 5

Van sommighen ongheleerden Apotekers noch ter tijt Harmel/ die naer veel vermaninghen van vele
gheleerden als van Leonicenus Manardus ende meer andere van huer dwalinghe niet sceyden en
willen/ maer in huer ongheleertheyt met groote hartneckicheyt blyvende noch daghelijcx in plaetse van
saet van Ruyte dat in Griecx oock Harmel gheheeten wordt/ dat saet van Scheerlinck dat zy seer
dwaselick voor Harmel houden nemen/ dat es in plaetse van een ghesonde ende bequaeme medecyne
een seer hinderlijcke ende fenijnnighe ghebruycken ende in huer medecynen menghelen.
Och wanneer sal eens die tijt comen dat aldusdanighe moorddadighe Apotekers ende Apotekeressen
ghestraft selen worden? ende dat op dat werck ende konste van den Apotekers regaert/ ordene ende
wet ghestelt sal sijn? Want niet eer en salmen oprechtelijck die conste van Medecynen tot salicheyt/
profijt ende ghesontheyt van den siecken kunnen oft moghen ghebruycken voor dat regel ende ordene
op die Apotekerie ghestelt es/ ende alle die ongheleerde daer af ghesceyden selen sijn/ die huer
daghelijcx onderwinden te maken dat sy niet en kennen/ ia oock somtijts niet lesen en kunnen (die wy
wel by naeme souden kunnen ghenoemen) ende den slechten armen lieden die van huyse tot huyse om
goeden coop te hebben loopen/ wat in die hant stooten/ tzy goet oft quaet/ versch oft verstorven van
den medecijn gheordoneert oft niet/ ten minsten dat zy dat gelt crijghen/ niet achtende oft den siecken
wel oft qualicken becomen sal/ huer onsculdighende als qualicken coemt/ ende den Medecijn tseghen
redene ende waerheyt om huer onversadelicke ghiericheyt ende hertneckige ongheleertheyt te
deckene/ beschuldighende.
Hoe eest moghelijck dan dat met den armen siecken wel vergaen kan/ alzoo langhe als dusdanige
grove onwetentheyt ende dese groote ongheregeltheyt onder die Apotekers in die steden en landen van
hertwaerts over blijft? ende dattet eene yeghelijcken toe ghelaten wordt tzy gheleert oft ongheleert/
man oft vrouwe/ aldusdanighe werck van seer grooten verlanghe te doene?
Wat batet dat medecijn meesters gheleert sijn/ studeren/ huer beste doen ende goeden raet gheven als
die moordadige Apotekers voor een profijtelijcke medecijne doodelick fenijn gheven?
Natuere
Scheerlinck es seer cout tot in den vierden graedt volcomelick.
Cracht ende werckinghe
A Scheerlinck op der iongh knechtkens scamelijcke leden gheleyt en laet die niet groot worden.
Diesghelijck oock op de ionghe dochteren borsten gheleyt doet die oock cleyn blijven/ maer maeckt
die selve ten eeuwighen daghen ghebreckelick ende onsterck.
B Scheerlinck op alle wildt vier ende verhittinghe