CINEMA SAN MIGEL
Gaur egun, zinera joateko asmoa badaukazu, nora joaten zara? Ziur aski
Social Antzokira joango zara edo Bilbora edo inguruko herriren batera.
Ba, orain dela 50 urte, San Migelen bertan bazeukaten zinema-aretoa.
Gernika kalean zegoen, Kultur etxetik oso gertu eta martxan egon zen
1963 eta 1973 bitartean, 10 urtez, gutxi gorabehera. «Cinema San
Migel» zeukan izena.
Gogoratzen dutenek kontatzen dute garrantzi handiko zinema izan zela
eta jende asko joaten zela Arrigorriagatik eta Basauritik. Bilbon estrenatu
ostean San Migel zen pelikulak estrenatzeko bigarren lekua.
Asteburuetan, bete-beterik egoten zen aretoa. Igande eta jaiegunetan,
16,30ean ,umeentzako pelikulak ematen zituzten. Bai plan ona!!