71
Leħen l-Għaqdiet Reliġjużi
Azzjoni Kattolika
Marsette Xerri LL.D.
President Azzjoni Kattolika Xewkija
L-Azzjoni Kattolika... lil hinn mill-indifferenza
Indubbjament, ma hijiex konklużjoni tiegħi, imma pjuttost sommarju ta’ dak li għadd ta’ antropoloġisti ta’
żmienna jsostnu fuq is-soċjetajiet tagħna, li waħda mill-mardiet li qegħdin jaħkmu lill-komunitajiet li ngħixu
fihom hija dik tal-indifferenza. Maħkumin minn ħajja ta’ rutina, li kwazi kważi tista’ ssejħilha mekkanika, fejn kull
jum huwa ġlieda kontinwa mal-ħin, l-element ta’ komunità qiegħed bil-mod il-mod jisfaxxa. Frott neċessitajiet
finanzjarji? Jista’ jkun. Sforz kultura li qiegħda ssir dejjem iktar individwalista? Hemm probabilità.
L-Azzjoni Kattolika, b’mod partikolari din tar-raħal tagħna, li tifrex fuq għadd ta’ frajja li tista’ tgħid jinkorporaw
fihom l-istati diversi tal-ħajja, teżerċita l-isforzi tagħha sabiex l-element ta’ komunità jibqa’ wieħed ħaj. Din
l-għaqda tipprova li dan l-għan tilħqu billi tibda tilqa’ fi ħdanha persuni ta’ età zgħira, u fil-fatt tibda milladoloxxenti, li, indubbjament, il-formazzjoni tagħhom tilgħab irwol vitali ħafna fil-komunitajiet futuri. L-impenn
sabiex dawk il-valuri li kienu l-pedamenti li fuqhom kienu msejsa l-karattri tal-istess fundaturi tal-Azzjoni
Kattolika jibqgħu jsibu għeruqhom huwa għalhekk wieħed kruċjali.
Bl-istess manjiera, l-Azzjoni Kattolika tħoss il-bżonn li tassisti lill-individwu fil-bqija tal-mixja ta’ ħajtu, u
tipperċepixxi bħala importanti ħafna l-eżistenza ta’ familji b’saħħithom. Għal dan il-għan tara illi dawk il-koppji
li jħaddnu l-intenzjoni li jibqgħu mexjin id f’id sabiex joħolqu familja, jiġu mogħtija tagħrif adegwat sopportat
minn esperjenzi ta’ koppji li diġà jkunu imbarkaw fuq dan l-impenn. L-Azzjoni Kattolika ma tiqafx biss hawn,
iżda tkompli tassisti wkoll lill-koppji ġaladarba l-familja tkun inbniet, biex b’hekk il-formazzjoni tkun waħda
kontinwa u gradwali. Sabiex kull bżonn jiġi kemm jista’ jkun indirizzat bl-aħjar mod possibbli, il-laqgħat relattivi
jiġu mqassma b’mod approprit, u ċioè dawk għall- koppji li jkunu ngħaqdu fis-sagrament taż-żwieg riċenti, u
oħrajn illi jkunu daħlu sew fir-rutina ta’ familja.
Il-katina soċjali li l-Azzjoni Kattolika tittenta tinseġ tiġbor fiha wkoll il-frajja tal-irġiel, xebbiet u romol. Tara li
tkun għaqda parteċipi sabiex kull individwu jkun ċellola ħajja fi ħdan il-katina soċjali. Hija għaqda li għaldaqstant
temmen li lkoll kemm aħna għandna sejħa sabiex id-dritt tal-opinjoni u l-prattika tar-reliġjon ma jiġix imkasbar; u
li kontestwalment, id-dritt tad-dijalettika u tal-konversazzjoni huwa mpenn li jeħtieg li nassumu lkoll kemm aħna.
Addizzjonalment, l-Azzjoni Kattolika hija sfera li temmen bis-sħiħ li komunità b’saħħitha tinbena b’imgiba
kollettiva. Għaldaqstant, jiena nemmen li jeħtieġ inkomplu naħdmu sabiex il-komunitajtiet tagħna jissaħħu,
jinfetħu, jitjiebu u jisbieħu. Huwa propju għalhekk li l-għaqda tagħna hija mifruxa f’diversi frajja li jolqtu l-istati
diversi tal-ħajja. Jeħtieġ ikollna sens ta’ appartenenza għall-irħula li ngħixu u li trabbejna fihom u huwa għal din
ir-raġuni li l-Azzjoni Kattolika hija mwaħħda mal-parroċċa li minnha temani.
Jeħtieġ li napprezzaw li l-futur ta’ kull wieħed u kull waħda minna huwa assimilat mal-ġejjieni tal-komunitajiet
tagħna, u allura bbażat fuq il-ħtieġa li nseddqu fina l-valur tar-rispett reċiproku u ta’ ġustizzja soċjali. L-Azzjoni
Kattolika tagħraf li, sfortunatament, il-komunità diffiċli teżisti f’armonija perfetta, iżda pjuttost ħafna drabi ssib
ruħha f’tensjoni, u għalhekk, tara l-ħtieġa u taħdem favur il-kunċett ta’ katina soċjali, fejn inservu ta’ spalla għal
xulxin, nikkumbattu l-intoppi, u naffaċjaw l-isfidi b’mod kollettiv.
Bla dubju ta’ xejn, l-ebda wieħed mill-għanijiet fuq imsemmija ma jirnexxielhom jintlaħqu jekk ma jkunx hemm
impenn attiv mill-għadd ta’ diriġenti fi ħdan l-għaqda. Nixtieq għalhekk, nieħu l-opportunità sabiex nesprimi
s-sens ta’ gratitudni tiegħi lejn id-diretturi spiritwali, id-diriġenti, l-assistenti ekkleżjastiċi u l-imseħbin ħabrieka,
talli minkejja l-impenji l-oħra kollha li għandhom, dejjem jagħrfu jsibu ħin u jegħlbu l-indifferenza u l-passività.
F’isem l-Azzjoni Kattolika jiena nawgura lil kull Xewki l-festa t-tajba.