“Nos ta sigur cu veld lo contribui cu desaroyo di nos hobennan”
Minister Benny Sevinger ta felicita bario di Brazil
ORANJESTAD – Minister Benny Sevinger ta hunga un papel esencial den e proyecto di mehoracion di veld di bala na Centro di Bario Brazil, mescos cu na tur otro proyecto di infrastructura cu Gabinete Mike Eman ta ehecutando riba nos isla. Aunke cu Sevinger mes ta duna credito na Premier Eman como esun cu constantemente ta pusha e iniciativanan social, e trabou di departamento manera DOW ta clave den e ehecucion. “Tur hende cu a coopera a pone un granito; DOW a percura pa e tipo di ondergronds cu mester a bin, tubo, etc.” Minister Sevinger a splica cu esaki ta e retonan tipico di un proyecto asina. “E proyecto aki no a bin si no ta pa nos Minister President. Den Conseho di Minister e ta pasa den tur e proyecto y e kier sa con leu cada un di nan ta paso e mes ta cana den e barionan y e sa kico ta falta,” e titular di infrastructura a bisa na e ciudadanonan di Brazil reuni na inicio di e trabounan siman pasa. Prome Minister di su banda ta gradici e empeño cu Minister Sevinger a pone den e proyecto pa haya e fondonan necesario den su presupuesto. “Si no tabatin placa den agenda, mester a trahe. Tur diamars y diabierna e (Prome Minister) ta puntra si ta cla, con ta bayendo… paso e proyecto aki ta asina importante pa nos muchanan di brazil.” Como un tata y homber cu a crece den ambiente di un bario hopi uni, Minister Sevinger ta hopi consciente di e balor cu un facilidad deportivo tin den un comunidad. P’esey mes el a uni su mes na e esfuersonan di Gabinete Mike Eman di inmediato pa haci di e deseo di bario di Brazil, un realidad. E titular di Infrastructura, Integracion y Medio Ambiente ta combenci cu e mehoracion di e tereno di wega cu ta bay haya yerba, pero tambe iluminacion, ta bay ta un exito. “Nos ta sigur cu e lo bay contribui na desaroyo di nos hobennan aki y nan futuro.” E trabounan ya a cuminsa y lo tuma rond di un luna pa keda cla. For di awor caba Minister Sevinger ta felicita e bisindario pariba di brug. “Pabien na pueblo di Brazil; pabien na e muchanan di bario di Brazil y Centro di Bario Brazil.” Den e caso di e proyecto aki, e mehoracion di e facilidadnan deportivo ta e resultado di e union di esfuerso entre sector publico y priva. Esaki ta e formula exitoso cu Gabinete Mike Eman a bin ta implementa ya for di algun aña caba pa duna un manera na e diferente organisacionnan deportivo rond di Aruba.
4
E-Vespertino.com