Dokternan di Cas awor por duna dos receta
Un pa bebe remedi y otro pa haci ehercicio
ORANJESTAD , Aruba 28 UGUSTUS 2013 : EIM ta drenta AZV su programa di ProMedico, un proyecto cu Minister Visser a hinca hopi esfuerzo y dedicacion den dje convenci cu prevencion ta indispensabel den e oficina di e dokter di cas. Malesanan cronico no-transmisibel (NCDs) ta entre e top na contienda di e cantidad di morto cu nos ta observa riba nos isla. E factornan di riesgo pa desaroya malesanan cronico no –transmisibel ta entre otro falta di of , “IN” actividad fisico y claro un dieta no saludabel. Door di e crecemento devastador di malesanan no transmisibel, ta obvio cu mester a introduci un forma di prevencion. Representantenan di cuido y di salud primario a acerca Minister di Salud y Deporte cu nan preocupacion y di aki e concepto di “Exercise is Medicine” ,EIM a nace. EIM ta un campaña di prevencion cu a wordo adopta di e “American College of Sport Medicine”. A comproba cu ehercicio ta yuda reduci e riesgo di malesa di curason cu 40%, stroke cu 27%, diabetes cu 50%, presion halto cu 50%, y cancer di colon cu mas di 60% (EIM, 2012). EIM ta un trabou conhunto di IBiSA y nos dokternan di cas. E concepto ta pa ofrece persona y of pashentnan di tur edad cu of sin desabilidad fisico un programa di EIM individualisa. E compromiso di Minister di Salud y Deporte a hiba na instalacion di un comision cu ta consisti di representacion di Dokternan di Cas, Specialista (Cardiologo y Ortopedista), Bedrijfsarts, Fisioterapista y profesionalnan den maneho di salud di ministerio y encabesa pa Minister di Salud y Deporte. IBiSA cu EIM Team ta haci esfuerso pa esunnan cu participa na e programa aki wak e beneficionan asocia cu actividad fisico. Y educa e participantenan den e programa, conscientisa nan riba e importancia di combina un alimentacion balansa y saludabel cu actividad fisico regular. Nos realidad na Aruba ta cu e profesional di salud conhuntamente cu Minister di Salud ta den e proceso pa convence dokternan di cas riba e grado di exito di e programa aki. EIM y cualkier otro programa di prevencion nan exito lo depende di e compromiso y participacion di servicio di cuido di nos isla y particularmente di e esfuerso y dedicacion di e Dokter di Cas pa e por ta un exito. E “huisarts” ta di un importancia indiscutibel, nan ta e prome punto di acceso pa e pashent. E pashent ta considera e Dokter di Cas como e autoridad den salud debi na e relacion estrecho cu pashent tin cu ne. Esaki ta motibo cu e punto di referencia ta e “huisarts” e candidato corecto pa ofrece apoyo y guia pashentnan cu mester inicia of mantene un estilo di bida saludabel. Riba 18 di Februari 2013, a firma un “Memorandum of Understanding” (MOU), esaki a keda firma pa representantenan di e sector di salud den cuido primario (asociacion di Dokternan di Cas y specialistanan) y e Minister di Salud y Deporte promoviendo EIM como un prioridad. E tarea di e dokter di cas den esaki ta cu su participacion y prescripcion lo inclui ehercicio como un forma di remedi adicional na e prescripcion di remedi tradicional y consecuentemente ta referi e pashent na profesionalnan den e ramo di ehercicio. Minister Visser ta consciente cu gobierno ta depende di e sector di cuido pa cu e exito, gobierno por duna apoyo, por informa pero e factor di exito a lo largo ta depende di e sector di cuido. Actualmente ya caba tur dr di cas por haya e programa riba nan computer. Minister Visser a bishita Dr. Joaquin van Trigt pa personalmente experiencia con facil e uzo di e programa aki ta. Minister Visser ta convenci cu esaki ta otro herment na disposicion di e dokter di cas pa apoye den contra aresta malesanan cronico dor di combina medicina tradicional cu ehercicio ta medicina. Y cu e publico en general specialmente e pashent lo mester experiencia cu ehercicio ta combati y preveni desaroyo di malesanan cronico. 9
E-Verspectivo.com