Museo Arkeologico ta drenta fase di mantencion y optimalisacion
ORANJESTAD, Aruba - 29 di Augustus 2013: Diahuebs mainta a duna un inicio simbolico na e proyecto di mantencion y optimalisacion di e edificionan di Museo Arkeologico Aruba (MANA). Esaki a tuma luga den presencia di Minister di Asuntonan Economico, Asuntonan Social y Cultura Michelle HooyboerWinklaar kende ta masha entusiasma cu e proyecto aki. El a duna di conoce cu esaki ta posibel danki na diferente fondo cu a ser poni disponibel door di Minister di Cultura, Minister di Turismo y Minister di Infrastructura como tambe
otro instancianan. Ta rekeri 1.1 miyon Florin pa mantene e edificio aki na Schelpstraat cu 6 aña pasa a wordo restaura y esey tabata un inversion di mas o menos 23 miyon florin. Mas cu claro, despues di un par di aña tin cosnan cu mester wordo drecha, entre otro e gebouw mester wordo geverf, e piso mester wordo drecha y tur esaki ta rekeri fondonan pa por haci’e, e mandatario a splica. Un otro aspecto cu e Minister a enfatisa ta con pa haci Museo mas accesibel pa esunnan cu tin limitacion. “Esey pa mi tabata un di e motibonan sigur pa sostene esaki
y busca e fondonan necesario pasobra con cu bay bin esey ta unda nos mester bay, no solamente pa Museo, pero tur e diferente gebouwnan cu nan por ta accesibel pa cualkier persona”. Railsnan, rampanan, ta cosnan cu ta bay bin cu e mantencion y optimalisacion aki. Museo Arkeologico ta un joya y ta algo cu mester wordo proteha. Tin diferente motibo pakico mester pone e fondonan disponibel y sigui inverti den dje, Minister Hooyboer-Winklaar a manifesta. Banda di esaki e mandatario a haci hopi enfasis riba e hecho cu ta importante pa sigui pensa riba kico ta necesario pa mantene loke ta ser inverti den dje caba. E proyecto aki ta bay dura entre 6 pa 8 luna y ta bay ta algo pa celebra. Arminda Franken-Ruiz kende ta encarga cu MANA a splica cu na aña 2009 MANA a habri pa publico na Schelpstraat 42. E compleho di edificionan conoci como Casnan Ecury ta monumentonan protegi. Gobierno hunto cu EEG a inverti 23 miyon florin pa restaura e edificionan aki y uza nan como museo.
“Awe nos ta hopi contento cu nos por anuncia cu Gobierno a aloca 750 mil florin caba pa un mantencion y optimalisacion cu lo costa mas o menos 1,1 miyon florin. E mantencion lo inclui entre otro verfmento, drecha e parti di arkitectura historico como tambe e parti nobo y banda di esaki lo optimalisa e museo. MANA lo ta mas accesibel pa hendenan cu limitacion, hendenan di edad grandi. Ademas di esaki lo bin camaranan di seguridad paden y pafo di museo. Lo crea un parkinglot den cooperacion cu DOW, cual sigur lo embeyece museo, el a bisa. Ta spera cu e trabaonan aki lo por keda cla na Maart 2014 y pa e momento ey lo tin e prome exposicion internacional na MANA, Arminda Franken-Ruiz a expresa.
E-Verspectivo.com
7