Prome Minister Eman y Magaly Brito di SEPPA a firma acuerdo cu ta regla un miho salario pa empleadonan publico di mantencion (werksternan)
Eman “Nos ta hopi orguyoso di por a haci e cambio aki”
ORANJESTAD- Den edificio di SIMAR Prome Minister Eman y Magaly Brito di SEPPA a firma e protocol cu ta duna empleadonan publico cu ta encarga cu trabounan di mantencion (werkster) un miho posicion y siguridad di trabou. Esaki a sosode den presencia di un cantidad grandi di e empleadonan publico concerni. E alegria riba nan cara tabata papia pa su mes. Prome Minister Eman a bisa cu ya pa algun aña caba gobierno ta den dialogo riba e situacion di trabou di e empleadonan aki. “Desde inicio di e gobernacion aki nos ta di acuerdo cu algo mester a wordo haci na salario pa esnan cu ta percura pa mantene e interior di nos edificionan limpi. E personal aki tabatin un salario fiho y no tabatin cambio den esaki ni cuanto aña cu nan tabata traha”. Eman ta bisa cu hunto cu sindicato SEPPA cu semper a sali duro na vanguardia di e empleadonan aki, a studia e situacion cu nan ta den pa hopi aña caba. Claro cu mester a wak tambe e recursonan cu gobierno tin y e necesidad di esnan cu ta eherce e trabou duro aki. Aki ta trata empleadonan cu ta traha den departamentonan di gobierno y tambe den institutonan cu ta wordo subsidia pa gobierno. Dirigiendo su mes na e empleadonan presente Prome Minister Eman a bisa nan cu e tin bon noticia pa nan. “Un noticia cu despues di hopi combersacion cu sindicato y tambe despues di a wak cifranan y contacto cu e personal envolvi, nos tabata convenci cu algo mester a wordo haci. Esaki a bin den forma di un ‘rangenstelsel’ nobo”. Eman a duna un splicacion riba e cambio y tambe a haci un diferencia entre trabou menos pisa y trabou pisa. Pa e trabou menos pisa e salario tabata Alf.1895,00 y pa e trabou pisa Afl.2135,00. E suma aki no tabata cambia conforme e añanan di trabou. E protocol firma ta encera un areglo nobo den e sistema di salario. Gobierno ta trahando duro pa esaki drenta na vigor e luna aki caba. “Si tur papeleo keda cla pa fin di e luna aki boso por mira un diferencia den salario”. Dunando un ehempel di e cambio Prome Minister a bisa cu si un hende tin tres aña trahando como werkster su salario ta subi cu 220 florin. Enbes di gana y keda para riba e salario di Afl.1895 e ta bay gana Afl. 2115. Cu shete aña di servicio e ta bay gana Afl. 2225,00 cu ta un aumento substancial di Afl. 330. Cu dies aña di servicio e ta bay dilanti di Alf. 1895 pa Afl. 2280 cu ta un adelanto di 385 florin mensual. Esnan cu tin 13 aña of mas den servicio ta haya un salario di Afl.2390,00 cu ta un aumento di 495 florin. Aplauso grandi tabata interumpi Prome Minister Eman caba bes cu e tabata menciona e cifranan nobo. Eman: “E crecemento ta grandi, pero realidad ta tambe cu ainda e sumanan aki ta dificil pa den e temponan cu nos ta bibando aden. Nos ta consciente di esey tambe, pero nos ta hopi orguyoso di por a haci e cambio aki”. Despues Eman a bay over na duna splicacion cu ehempelnan con e salario di esnan cu ta haci trabounan pisa di mantencion ta bay bira. Pa esnan cu tin tres aña di servicio e salario ta aworaki Afl. 2135 y esaki ta bira Afl.2270 cu ta un adelanto di 135 florin. Shete aña di servicio ta bira Afl. 2345, 210 florin extra, cu dies aña di servicio e suma ta cambia di Afl. 2135 pa Afl. 2420, un progreso di 285 florin y pa 13 aña di servicio of mas e ta bay dilanti cu 435 florin yegando e suma di Afl. 2570. Despues di e bon noticia aki cu a laga masha hopi hende contento Eman a bisa cu su gobierno no ta kere cu empleadonan mester bay 7 siman riba caya pa un ahuste di salario. “Ta p’esey cu nos a cuminsa mes ora cu nos a sinta cu negociacionnan cu sindicatonan di empleadonan publico. Asina a yega na introduccion di indexering di 105 florin, pa di dos aña un indexering di Afl.140 y di tras aña di 85 florin. Nos a subi e toeslagen di voor- y najaarspremie. A haci esaki pa hisa poder di compra y tambe pasobra tabata e palabracion haci cu sindicatonan”. Eman a felicita e empleadonan cu nan progreso cu tin apoyo total di tur minister. Na final el a gradici funcionarionan ehecutivo Piet Pronk y Omar Harms cu a yuda hopi riba e acuerdo aki. Pa Magaly Brito di sindicato SEPPA y miembronan di directiva Eman tabatin palabranan di danki y elogio pa e forma con nan a bataya duro pa nan miembronan.
E-Verspectivo.com
7