Erase unha vez unha cidade...a nosa cidade. Tan cercana e ó tempo tan
descoñecida.
Daquela nós quixemos achegarnos un poquiño ata o seu corazón e ir
descubrindo paso a pasiño o seu latexo.
Durante 9 meses esforzámonos por coñecer Vigo, por ollar dentro daqueles
recunchiños polos que -de certo- pasamos mil e unha veces. Despois deste longo
percorrido polas nosas rúas coidamos que todos temos gañado unha carreira,
cáseque unha maratón.
Agora coñecemos mellor as súas rúas máis importantes, as súas esculturas, os
seus edificios máis senlleiros... e cando miramos para ela nos nosos paseos
atopamos cousas nas que non repararamos antes. Nas nosas andainas temos
botado un olliño tamén a súa historia e porén sabemos como xurdiu, como foi
medrando, como foi deixando anaquiños importantes no camiño, como foi a súa
vida antes e como é agora. Coñecemos tamén a arte máis nova dalgunhas rúas,
esas nas que aínda non secou a pintura dos murais; a nosa paixón artística máis
actual é xa case un sinal de identidade. Coñecimos ao longo do ano as rúas vivas
debullando unha a unha as festas máis de noso.
Os ollos de Vigo son eses ollos nos que nos asomamos á cidade albiscando
un cachiño da súa esencia: Os ollos do Sereo, do Dinoseto, de Verne e o seu
Polbo, do Barquiño, da Fada e o Dragón, dos Redeiros e dos Cabalos.
Os ollos de Vigo son tamén os nosos ollos, os dos nenos de infantil -que
cáseque ollaban por primeira vez a cidade- e os dos cursos dos maiores que
aprenderon a vivila na súas pescudas. E son tamén os nosos ollos de adultos, os
que a cotío vivimos nela sen sentila. Son os ollos dos que preparando este
traballo temos agochado nas nosas mans toda esa información e ó facernos máis
sabedores de Vigo fómolo gardando todo no noso corazón e aprendemos a
escoitar a súa fala.
Coas nosas descubertas Vigo xa é noso; e nós somos Vigo.
Todo este tempo pasado vai deixar unha profunda pegada nas nosas vidas e no
noso cole, como tantos outros proxectos que traballamos e vivimos. Serán
cousas para lembrar
agora que
no novo curso están a piques de chegar intres
moi especiais para nós.
2