Vuli 2:
NA VOSA NI KALOU KEI NA
NOMU BULA NI MASU
Lesoni: Roma 8: 26-27
“Ia na Yalo Tabu talega sa vukea na noda malumalumu: ni da sa
sega ni kila na ka e kilikili kei keda meda kerea: a sa masulaki
keda na Yalo Tabu ena vutugu e sega ni cavuti rawa. Ia ko koya
sa daudikeva na yaloda sa kila na loma ni Yalo Tabu, ni sa
masulaki ira na tamata lotu me vaka na loma ni Kalou.”
E dodonu me vakabauta na tamata vakabulai kece na kaukauwa
e tiko ena masu me veisautaka na nodra bula kei na nodra bula
na tani. Ena rawa talega ni da vakadinadinataka e vuqa vei
keda ni da a mai veikilai kei Jisu Karisito me nodai Vakabula
baleta ni dua a masulaki keda tiko mai na vanua e tiko kina.
Na kaukauwa ni masu e sega ni rawa ni vakamacalataki
vakatamata baleta ni oqo e dua na tiki ni noda bula vakayalo
ka dodonu me vakabauti, cakacakataki ka bulataki me rawa
ni vakayaco ka vei keda. Na nomu masu e rawa ni tara na
vuravura, vakayaco ka ena bula ni tamata ka vakasucuma mai
na bula vuavuai vakalomalagi. E sureti keda tiko na Kalou
ki na vanua oqo ni veitokani voleka sara kei Koya ena masu.
Na masu e noda veitokani kei na Kalou ka sega tale ni dua na sala
vinaka ni nomu veitokani ka veitalanoa kei Koya me vaka na nomu
vakayagataka ga na Nona vosa. Ni da masu ka da vakayagataka na
Vosa ni Kalou, e yaragi kaukauwa duadua ka tiko vei keda baleta
eda masu sara tikoga me vaka na loma ni Kalou. Na Kalou e kaya
ni na sauma na noda masu kevaka eda masu me vaka na lomana
(1 Joni 5:14-15). Kevaka e vutugu tiko na Yalo Tabu ena nona
masulaki keda me vaka na loma ni Kalou (Roma 8:27), qai vakacava
na kena bibi meda ia talega vakakina. E sega tale ni dua na ka e
vakatakila vei keda na loma ni Kalou me vaka na Vosa ni Kalou.
Na masu vakaivolatabu e vakaukauwataka na noda tamata e
loma (yaloda). Ena Joni 6:63, e kaya vakaoqo ko Jisu: “Na yalo
sa solia na bula: na lewena sa sega ni yaga: a vosa ka’u vosataka
vei kemudou sa vakayalo, ka sa vu ni bula.” Na Vosa ni Kalou e
vakayalo ka vu ni bula! Na yaloda sai koya na tiki ni noda bula
e rau veitaratara kei na Kalou. E bibi kina me vakani na yaloda
ena kena kakana donu me tubu ka matua kina. Na Vosa ni Kalou
e solia na bula ki na yaloda, kei na gauna kece eda masu kina
5