NA VOSA NI KALOU SA
VU NI BULA KI NA KA KECEGA
Na iNaki Ni Veilesoni Oqo
Na veilesoni era tiko oqo ena veivuke vei iko mo rawa ni kila
vinaka kina na yaga ni Vosa ni Kalou ki na nomu bula. Na Vosa
ni Kalou e Kalou vakataki koya (Joni 1:1). E kenai balebale oqo ni
sega ni rawa ni ko tawasea na Kalou mai na nona Vosa. Na Kalou
ena vauci koya ga na Vosa e cavuta; ia na nona Vosa e tiko kina
na nona BULA E VAKALOU.
E kaya nai Vola Tabu ena Tiko Voli Mai Na Lekutu 23:19, “Sa
sega ni tamata na Kalou, me mai vosa lasu ko koya; Se na luve
ni tamata, me mai veivutuni: Sa kaya li ko koya, ka na sega ni
cakava? Se sa vosa li ko koya, ka na sega ni vakayacora?” E
matata ena tiki ni Vola Tabu oqo ni Vosa ni Kalou e taucoko ka
da rawa ni vakanuinui kina, baleta na Kalou e sega ni tamata. O
koya e Kalou. E sega ni rawa ni lasu se druka ena dua na gauna. E
rawa ni lasu na ka kecega ena vuravura oqo, ia na Vosa ni Kalou
e noda yavu dei baleta na Kalou e vauci koya ga na nona Vosa, ia
na nona Vosa ena vakataudeitaki. E sega ni rawa ni dua na ka e
veisautaka se tarova na kena vakavotukanataki na nona vosa ena
nomu bula.
Na Vosa ni Kalou sai koya na bula sara ga ni Kalou vakataki
koya. Ena gauna a buli Atama kina na Kalou mai na kuvu ni
qele ena Vakatekivu 2:7, a qai yaco ga me yalo bula se bula ko
Atama ni sa “ceguva ki na ucuna nai cegu ni bula.” Eda na rawa
ni vakataudeitaka eke e dua na dina ka na sega ni vakayavalati
rawa. Na vosa kece eda cavuta ena sala vata ga kei nai cegu. Nai
cegu e dua na tiki bibi ni vosa eda cavuta. Oqo na ka sara ga ka
yaco vei Atama ena gauna a davo galugalu koto kina ena nona
waqa qele (yagona). A sega ni dua na bula e tu vua. E qai curumi
koya ga na bula ni sa ceguvi koya na Kalou, e nai cegu ni Kalou,
sai koya sara ga na bula e tiko vua na Kalou.
Sa tiko na vakanuinui ni gauna e sa na mai cava kina na noda
vulica na veilesoni oqo, ena veisau vakadua na noda bula mai
loma e tautuba talega, ka sa na rawa talega ni da okata me bibi na
Vosa ni Kalou me vaka sara ga na noda qarauna me bibi vei keda
na Kalou ke lako vakatamata yani ki na noda loma ni vale.
Eda sa sureti me da mai lako vata ena loma ni vitu na siga oqo ka
vakadikeva vakamalua na veiwekani bibi e tiko ena Vosa ni Kalou
kei na noda bula ena gauna oqo. Sa nuitaki ni da na marautaka
nai lakolako oqo!
1