ծանոթանալ վայրի բնաշխարհի ներկայացուցիչների հետ և
հենց կենդանաբանական այգիների միջոցով են կյանքի
կոչվում կրթադաստիարակչական ծրագրեր՝ ուղղված մատաղ սերնդի զարգացմանը, բնության նկատմամբ սեր ու
հոգածություն սերմանելուն:
Իմ հոդվածի եզրակացությունն այն էր, որ պետք է ոչ
թե համատարած փակել կենդանաբանական այգիները, այլ
սատարել, որ դրանք զարգանան, որ բարելավվեն
դրանցում առկա պայմանները, որ այգիներն ու դրանց
բնակիչները ունենան բնականին այնքան մոտ կենսապայմաններ, որ իրենց լավ ու հարմարավետ զգան: Ես
հատուկ նշելու էի, որ անհասկանալի դաժանությամբ աչքի
ընկած կենդանաբանական այգիների նկատմամբ պետք է
կիրառել խիստ պատժամիջոցներ, իսկ բարեխղճորեն
գործող այգիները հետևողականորեն դարձնել օրինակ, որ
միևնույն է՝ ոչ մի հարմար պայման չի կարող փոխարինել
վայրի բնությանը, սակայն եթե կենդանաբանական այգին
քաղաքակրթության մի անբաժանելի տարր է և մշակութաբանական առումով՝ մեր կյանքի անքակտելի մաս, ապա
պետք է այդ տարրին վերաբերվել քաղաքակիրթ
մակարդակով ու պատշաճ գիտակցությամբ:
Շարունակում էի զբոսնել մեր այգում ու մտորել՝
ուրույն ոգևորություն ապրելով, որ ինքս ինձ համար գտել եմ
այս խնդրի պարզաբանման ու լուծման «բանալին»:
Քայլելով հասա այգու գիշատիչների բաժնին ու
կանգ առա ընձառյուծի վանդակի առջև: R