Agoloso Presents - Atondido Stories Agoloso Presents - Paphata pa Chichewa | Page 393

Paphata pa Chichewa
Yendana pamsolo (pamutu): Kudererana.
Chitsanzo: Anthuwa amayendana pamsolo, bwanji tsiku
lina adzangobandulana?
Yendera kumbuyo: Kudzitama.
Chitsanzo: Sindifuna kucheza nawo chifukwa akakhala
amakonda kuyendera kumbuyo.
Yendera kumsana: Nyada, nyang’wa.
Chitsanzo: Anayamba kuyendera kumsana atangogula
ng’ombe zija.
Yepula: Kungodutsa pamwambamwamba, kutenga
pang’ono.
Chitsanzo: (1) Sanachotse maluwa onse, anangowayepula.
(2) Mitanda yake amangoyepula.
Yera m’maso:
(a) Kuchenjeretsa, kusaona zotsatira zoopsa za zimene
ukuchita.
Chitsanzo: (1) Lerotu wayera m’maso, ukufuna kulira eti?
(2) Wayera m’maso, wayamba kuzindikira.
(b) Kuzindikira.
Chitsanzo: Apa ndiye ndayera m’maso, kani zimayenda
chonchi!
Yeretsa m’maso: Kukubera kapena kuchenjeretsa
munthu, kupusitsa.
Chitsanzo: (1) Ndinadziwa kuti kupusa kumeneku
amuyeretsa m’maso. (2) Usamalire chikwama chakochi
anthu angakuyeretse m’maso.
Yetsemula: Kuchira matenda aakulu.
Chitsanzo: Bambo anagonekedwa kuchipatala aja
ayetsemula.
Yokhetsa thukuta: Ntchito yovuta kwambiri, yolemetsa.
Chitsanzo: Ukaphunzira kwambiri, sugwira ntchito
yokhetsa thukuta.
392